اسلام ٹائمز۔ لوڈشیڈنگ کے خلاف عوام کی دہائیاں کسی حد تک رنگ لے آئیں اور صدر زرداری نے فوری طور پر پاور ہاؤسز کو گیس کی فراہمی کی ہدایت کرتے ہوئے وفاقی وزیر پیٹرولیم کو بجلی بحران کے حل کا حکم دے دیا۔ پنجاب میں طویل اور غیر اعلانیہ لوڈشیڈنگ کے خلاف پرتشدد مظاہروں کے بعد صدر آصف علی زرداری نے صورتحال کا نوٹس لے لیا۔ صدر نے وفاقی وزیر پیٹرولیم ڈاکٹر عاصم کو حکم دیا کہ پنجاب میں بجلی کے بحران پر قابو پانے کیلئے فوری اقدامات کیے جائیں۔ صدر نے پاور ہاؤسز کو تیل اور گیس کی فراہمی بڑھانے کی بھی ہدایت کی۔ ذرائع کے مطابق حکومت فرٹیلائزر کمپنیوں کی گیس بند کر کے پاور ہاؤسز کو فراہم کرے گی، جس سے بجلی کا بحران پچاس فیصد کم ہو جائے گا۔