اسلام ٹائمز۔ سوات میں قائم تبلیغی مرکز میں دھماکے کے نتیجے میں 22 افراد جاں بحق جبکہ 60 سے زائد زخمی ہوگئے۔ ذرائع کے مطابق مینگورہ سے چھ کلو میٹر دور تختہ بند روڈ پر واقع تبلیغی مرکز میں جمعرات کی شام ایک بڑا اجتماع جاری تھا کہ اس دوران مرکز میں زوردار دھماکہ ہو گیا۔ دھماکہ عمارت کے تہہ خانے میں ہوا جو اس قدر شدید تھا کہ اس کی آواز دور تک سنائی دی گئی۔ دھماکے کے بعد زخمیوں کو فوری طور پر سیدو شریف اسپتال پہنچایا گیا۔ جہاں کئی زخمیوں کی حالت تشویشناک ہے۔ دھماکہ میں 22 افراد کے جاں بحق ہونے کی تصدیق ہو چکی ہے۔ جبکہ کئی زخمیوں کی حالت تشویش ناک بتائی جاتی ہے۔ واقعے کے بعد سیکورٹی اہلکاروں اور پولیس نے علاقے کو گھیرے میں لے لیا ہے اور تختہ بند روڈ اور اس کے آس پاس کے علاقوں میں سیکورٹی بڑھادی گئی ہے۔