گلگت بلتستان کے صوبائی پیکج کو آئینی تحفظ دے کر عوام کو حقوق دیئے جائیں، آغا راحت حسینی

اسلام ٹائمز۔ امام جمعہ والجماعت گلگت و ممتاز عالم دین علامہ سید راحت حسین الحسینی نے وفاقی حکومت سے گلگت بلتستان کے سیلف گورننس آرڈنینس کے تحت ملنے والے صوبائی پیکج کو آئینی تحفظ فراہم کرنے کا مطالبہ کرتے ہوئے موقف اختیار کیا ہے کہ گلگت بلتستان کے عوام ملک کے دیگر صوبوں کے عوام کے مساوی حقوق سے محروم چلے آ رہے ہیں اور ہماری قومی اسمبلی اور سینیٹ میں کوئی نمائندگی نہیں جبکہ اس خطے میں وسائل کی کوئی کمی نہیں اور یہاں دستیاب قدرتی وسائل کو استعمال میں لا کر نا صرف گلگت بلتستان بلکہ پورے پاکستان کے معاشی نظام کو مستحکم کیا جا سکتا ہے۔ گلگت میں ضلع ہنزہ نگر اور گلگت کے علما کرام و عمائدین کے ایک وفد سے گفتگو کرتے ہوئے انہوں نے حکومت اور بیوروکریسی سے گلگت بلتستان کے خطے کو بھی مکمل قومی دھارے میں شامل کرتے ہوئے اسے ملک کا پانچواں آئینی صوبہ قرار دینے کا مطالبہ کیا ہے۔ علاہ ازیں انہوں نے عوام کو اپنے حقوق کے حصول کیلئے بیدار و متحد ہو کر عملی جدوجہد کرنے کی ضرورت پر زور دیا ہے۔