پاراچنار انتخابات اور مراجع عظام کا موقف

رپورٹ: جی اے شیراز

الیکشن اور جمہوریت کے بارے میں تو بعض لوگوں کے خیالات ویسے بھی ہمیشہ منفی رہتے ہیں۔ مثلاً طالبان انتخابات اور جمہوریت کو کفر قرار دیتے ہیں۔ اسی طرح بعض مذھبی گروہ بھی جمہوریت کو اسلام سے متصادم قرار دیتے ہیں۔ دیکھا جائے تو پاکستان بلکہ دنیا بھر میں رائج انتخابات کا نظام نہایت ہی فرسودہ بلکہ فضول قسم کا نظام ہے۔ جس میں بقول اقبال افراد کو گنا تو جاتا ہے لیکن تولا نہیں جاتا۔ پورے پاکستان میں مشاہدہ کیا جاسکتا ہے کہ ایک تعلیم یافتہ قابل اور اہل امیدوار کے مقابلے میں کسی ان پڑھ یا کم پڑھے لکھے، اور نااہل امیدوار کو سامنے لاکر کامیاب کرایا جاتا ہے۔ زیر نظر رپورٹ میں باقی دنیا یا پاکستان ہمارا موضوع نہیں، بلکہ ہمارا موضوع صرف کرم ایجنسی کے حلقہ این اے37 سے کھڑے امیدوار ہیں، جہاں انتخابات لڑنے والے امیدوار اگرچہ سب کے سب تعلیم یافتہ ہیں، تاہم اتنا فرق ضرور ہے کہ بعض اچھے ہیں مگر انکے مقابلے میں بعض بہترین بھی موجود ہیں۔ تو عقل اور منطق اور وجدان انسان کو حکم دیتے ہیں کہ دو بروں میں سے کم برے کا انتخاب کیا جائے جبکہ اچھوں میں سے بہترین کا انتخاب کیا جائے۔

چنانچہ کرم ایجنسی کے تمام افراد نہ صحیح تو کم از کم عوام کی اکثریت بہترین پر متفق تھی، عوام کی 90 فیصد اکثریت بہترین کی جانب مائل تھی کہ اس دوران آرٹیکل 62 اور 63 کی خلاف ورزی شروع ہوئی اور مذھب اور دین کا نام استعمال کرکے اعلٰی تعلیم یافتہ، اچھی شہرت کے حامل، پوری زندگی ووٹ لئے بغیر عوام کی ہر میدان میں خدمت کرنے والے امیدواروں کے مقابلے میں ایک دفعہ آزمائے ہوئے امیدوار کو لاکھڑا کیا گیا۔ اپنے مطلوبہ امیدوار کے لئے مذھب کو کچھ اس طرح استعمال کیا گیا کہ فلاں کو ووٹ دو، یہ فلاں کو ووٹ ہے اور فلاں کو ووٹ کے برابر ہے۔ نیز یہ کہ 11 مئی کو متفقہ طور پر گھروں سے نکل آو اور دشمنوں کو شکست فاش دو یعنی انکے مطلوبہ امیدوار کے مقابلے میں نہایت نیک سیرت، متقی اور اہل امیدواروں کے لئے ووٹ ڈالنے والوں کو دشمن قرار دیا گیا۔

یہی نہیں یہاں تک کہا گیا کہ میں پاراچنار میں چھ مجتہدین کا نمائندہ ہوں۔ آپ کا ووٹ چھ مجتہدین کو ووٹ ہے اور یہ کہ اگر آپ نے اس (میرے حمایت یافتہ امیدوار) کو ووٹ نہ دیا تو تم نے مجتہدین کی مخالفت کی، اور یہ کہ زندگی بھر پڑھی جانے والی آپ کی تمام نمازیں بھی اکارت جائیں گی۔ ایک طرف زندگی بھر نمازیں پڑھنے والوں کا ضمیر چاہتا تھا کہ ایک قابل اور اہل شخص کے لئے ووٹ کاسٹ کریں جبکہ دوسری جانب مجتہدین اور نمازوں کا مسئلہ پیش آیا تو ان میں بعض باہمت افراد نے ہمت کرکے انٹرنیٹ پر مجتہدین سے رابطے کئے اور کسی کے نمائندہ ہونے یا نہ ہونے اور ووٹ کا حکم دینے کے متعلق رائے پوچھی گئی۔ 

اسکی پوری تفصیل ایک پمفلٹ کی صورت میں پاراچنار بازار میں تقسیم ہو رہی ہے۔ چنانچہ پوچھے جانے والے سوالات اور انکے جوابات کو اسی پمفلٹ سے کاپی کرکے اسلام ٹائمز کے قارئین کی دلچسپی کے لئے تفصیلاً پیش کرتے ہیں، تاکہ پاراچنار سے باہر دور دراز علاقوں میں رہنے والوں کو ایک طرف یہاں کے حالات کا صحیح اندازہ ہو، دوسرا یہ کہ وہ اس سلسلے میں محتاط رہیں کہ جب بھی مذھب یا مجتہدین کا نام استعمال کرکے کوئی غیر قانونی کام کیا جائے تو کسی اور کے پاس جانے کی بجائے خود ہی انٹرنیٹ پر مجتہدین کے دفاتر سے رابطہ کرکے معلومات حاصل کرسکیں۔
پمفلٹ میں دیئے گئے سوالات اور جوابات ایک صفحے پر فارسی میں ہیں جبکہ دوسرے صفحے پر اسکا اردو ترجمہ دیا گیا ہے، پانچ مجتہدین سے ٹوٹل تین سوالات کئے گئے ہیں، اور ہر ایک کا جواب اسی سوال کے ضمن میں علیحدہ علیحدہ درج ہے۔ ہم فارسی کو چھوڑ کر صرف اردو ترجمہ پر ہی اکتفا کرتے ہیں۔

سوالات:
1: آیا حضرت عالی کا پاکستان میں سیاسی نمائندہ ہے یا نہیں؟ اگر ہے تو مرقوم فرمائیں۔
2: آیا وہ شخص جو وجوہات (خمس اور زکات) میں آپ کا وکیل ہو، تو وہ اپنے قول و فعل کے ذریعے سیاسی اور اجتماعی امور میں آپ کی طرف نسبت دے سکتا ہے۔؟
3: انتخابات کے بارے میں نصیحت فرمائیں۔
مراجع عظام کا جواب:
1:۔ جواب دفتر آیت اللہ العظمٰی سید علی سیستانی کیطرف سے: ہم پاکستان اور ایران کے سیاسی امور میں مداخلت نہیں کرتے، ہم کسی کیلئے حکم نہیں کرسکتے، لیکن اتنا کرسکتے ہیں کہ جو کوئی بھی امور سیاسی میں ہماری نمائندگی کا دعویٰ کرتا ہے اسکو نصیحت کرتے ہیں کہ امور سیاست میں مداخلت نہ کریں اور معاشرے کے عمومی افراد کو بھی سفارش کرتے ہیں کہ انتخابات میں متقی اور اصلح شخص کو منتخب کریں۔ آیت اللہ العظمٰی سید علی سیستانی کے وکلاء جو امور حسبیہ اور وجوہات میں وکیل ہیں، اپنے سیاسی کردار کو آقای سیستانی کی طرف نسبت نہیں دے سکتے، آقای سیستانی کا وکیل و نمائندہ مطلق فقط داماد آقای سیستانی جناب حجتہ الاسلام والمسلمین سید جواد شہرستانی ہیں۔ انکے علاوہ اور کوئی آیت اللہ سیستانی کا وکیل یا نمائندہ مطلق نہیں ہے۔
 
2: جواب دفتر آیت اللہ العظمٰی ولی امر المسلمین سید علی خامنہ ای کیطرف سے: ہم اسطرح کے سوالات کا جواب نہیں دے سکتے، لیکن پھر بھی اگر کوئی ایسا (ہماری نمائندگی کا) دعویٰ کرے تو ان سے دلیل کتبی طلب کرلیں، یعنی یہ کہ انکے پاس رہبر معظم آیت اللہ العظمٰی سید علی خامنہ ای کا خط موجود ہونا چاہئے کہ رہبر نے فرمایا ہو کہ ہم نے اس شخص کو خمس و زکات کے علاوہ سیاست میں بھی وکیل قرار دیا ہے۔ اگر کسی کے پاس امور سیاسی میں مداخلت کے حوالے سے رہبر معظم کا خط موجود نہ ہو تو وہ ہمارا نمائندہ نہیں ہے۔
3: جواب: دفتر آیۃ اللہ العظمٰی صافی گلپائیگانی کیطرف سے: وکلاء آیت اللہ العظمٰی صافی گلپائیگانی امور سیاست میں مداخلت کا کوئی حق نہیں رکھتے، جسکی نسبت آقا کی طرف دی جائے، آنجناب کے وکلاء فقط خمس اور زکات میں اس حد تک تصرف کرسکتے ہیں کہ جس حد تک آقا نے اجازت دی ہو۔ 

4:۔ جواب: دفتر آیت اللہ العظمٰی وحید خراسانی کیطرف سے: جو کوئی بھی یہ دعویٰ کرے کہ میں وجوہات کے علاوہ امور سیاست میں بھی آیت اللہ العظمٰی وحید خراسانی کا نمائندہ ہوں، اسکو ہماری طرف سے جھٹلاو کیونکہ ہمارا سیاسی نمائندہ نہ پاکستان میں ہے اور نہ ہی ایران میں اور نہ ہی اور کسی جگہ موجود ہے۔
5: جواب: دفتر آیت اللہ العظمٰی نوری ہمدانی کیطرف سے: وہ وکلاٰء جو امور حسبیہ (خمس و زکات) میں آقای نوری ہمدانی کی وکالت رکھتے ہیں اور سیاست میں بھی مداخلت کریں اور انکی نسبت آیت اللہ العظمٰی نوری ہمدانی کی طرف دیں، یہ جائز نہیں ہے۔
 
نوٹ:
 مندرجہ بالا سوالات و جوابات کیلئے آپ خود بھی مندرجہ ذیل نمبرز اور ویب سائٹس اور ای میل پر رابطہ کرسکتے ہیں۔
1: آقائ سیستانی:
Phone: 00982517741415 , Email: sistani@sistan.org , web: www.sistani@org.com
2: رہبر معظم جناب سید علی خامنہ ای:
Web: www.leader.in
3: آغائے صافی گلپائیگانی
Web: www.safi@safi.net
4: آقائ وحید خراسانی