اسلام ٹائمز۔ پاکستان پیپلز پارٹی کے رہنما خورشید شاہ کا کہنا ہے کہ اگر ضیاءالحق کو پتہ ہوتا کہ ان کا روحانی بیٹا 62 اور 63 میں پھنس جائے گا تو وہ اسے ختم کر دیتا۔ چنیوٹ میں جلسہ عام سے خطاب میں سابق وزیراعظم نوازشریف کو تنقید کا نشانہ بناتے ہوئے خورشید شاہ کا کہنا تھا کہ آج کوئی کنٹینر پر چڑھ کر خود کو معصوم ثابت کرنے کی کوشش کر رہا ہے جبکہ اگر ضیاء الحق کو پتہ ہوتا کہ ان کا روحانی بیٹا آئین کے آرٹیکل 62 اور 63 میں پھنس جائیگا تو وہ اسے ختم کر دیتا۔ خورشید شاہ نے کہا کہ آج ملک میں گالی کی سیاست کی جا رہی ہے جبکہ کچھ لوگ کہتے ہیں پنجاب سے پیپلزپارٹی ختم ہو گئی ہے لیکن میرا ان کو جواب ہے کہ جب تک بھٹو کا ایک بھی ماننے والا زندہ ہے تب تک پارٹی زندہ رہے گی۔ انہوں نے مزید کہا کہ پیپلز پارٹی اقتدار کی سیاست نہیں کرتی کیوں کہ ہمیں حکمران بننے کا کوئی شوق نہیں ہے جب کہ ذوالفقار علی بھٹو ملک میں جمہوریت چاہتے تھے اور اقتدار غریب کے لئے چاہتے تھے۔