اپوزیشن کا کوئی ذاتی مطالبہ نہیں ہے، سردار عتیق

اسلام ٹائمز۔ مسلم کانفرنس کے قائد و سابق وزیراعظم سردار عتیق احمد خان نے کہا ہے کہ وزراء حکومت کی بڑی تعداد نے اپوزیشن کے موقف کی کھل کر حمایت کی۔ اپوزیشن کا کوئی ذاتی مطالبہ نہیں ہے، نواز لیگ حکومت نے کرپشن میں ماضی کے تمام ریکارڈ توڑ دئیے ہیں۔ انہوں نے کہا کہ بیرسٹر افتخار گیلانی جنہوں نے ہمارے مؤقف کی تائید کی کہ 11 کروڑ روپے کا ٹھیکہ غیرقانونی دیا گیا۔ سردار عتیق نے عامر الطاف، مشتاق منہاس، مسعود خالد، رشید ترابی اور اراکین اسمبلی کا شکریہ ادا کیا کہ جنہوں نے ان کے مؤقف کی حمایت کی۔ اتوار کے روز ایوان میں نکتہ اعتراض پر اظہار خیال کرتے ہوئے سردار عتیق احمد خان نے کہا کہ وزیر خزانہ کو تاحکم ثانی ذمہ داریاں سونپنا ان کے ساتھ مذاق ہے۔ موجودہ اپوزیشن نے انتہائی پارلیمانی انداز میں اپنا احتجاج کیا ہے۔