اسلام ٹائمز۔ چین نے برطانوی نشریاتی ادارے برٹش براڈ کاسٹنگ کارپوریشن (بی بی سی ورلڈ نیوز) پر پابندی عائد کر دی ہے۔ چین میں میڈیا کے نگران ادارے کا کہنا ہے کہ بی بی سی صحافتی قوانین کی خلاف ورزی کا مرتکب ہوا ہے۔ بی بی سی نے منصفانہ رپورٹنگ کے قوانین توڑے جس کی بناء پر اس کو چین میں نشریات کی اجازت نہیں دی جائے گی۔
دوسری جانب برطانیہ کے وزیر خارجہ ڈومینک راب نے بی بی سی پر پابندی کو آزادی صحافت پر قدغن قرار دیا ہے۔ بی بی سی انتظامیہ نے چین کے اس فیصلے پر مایوسی کا اظہار کیا ہے اور کہا ہے کہ بی بی سی دنیا کا سب سے زیادہ معتبر نشریاتی ادارہ ہے جو دنیا بھر سے ملنے والی خبروں کو منصفانہ اور غیر جانبدارانہ طور پر رپورٹ کرتا ہے۔ یاد رہے کہ بی بی سی اور وائس آف امریکہ کے بارے میں مبصرین کا کہنا ہے کہ وہ جانبداری کا مظاہرہ کرتے ہیں اور ہمیشہ منفی پہلو اجاگر کرتے ہیں۔