عثمان کاکڑ کی موت طبعی قرار، انتقال برین ہیمریج سے ہوا، ایم ایل رپورٹ

اسلام ٹائمز۔ گذشتہ روز وفات پانے والے پشتو نخوا ملی عوامی پارٹی کے صوبائی صدر اور سابق سینیٹر عثمان خان کاکڑ کی ایم ایل رپورٹ تیار کر لی گئی۔ رپورٹ کے نتائج میں ان کی موت کو طبعی قرار دیا گیا ہے۔ مزید اطلاعات کے مطابق ایم ایل رپورٹ میں کہا گیا ہے کہ عثمان کاکڑ کا انتقال برین ہیمریج سے ہوا ہے اور ان کے جسم پر تشدد کا کوئی نشان نہیں تھا، البتہ جسم کے مختلف حصوں پر سرجری یا کینولاز کے نشانات موجود تھے۔ کیمیکل اور پیتھولوجی رپورٹ آنے کے بعد وجہ موت کا حتمی تعین ہوسکے گا۔ ایم ایل رپورٹ کے مطابق موت طبعی ہے، تاہم پوسٹ مارٹم رپورٹ آئندہ ایک ہفتے تک آئے گی۔