کراچی:
اسلام ٹائمز۔ ایس ایس پی، سی آئی ڈی چوہدری اسلم کے گھر پر ہونے والے خودکش دھماکے کی ذمہ داری کالعدم تحریک طالبان پاکستان نے قبول کر لی ہے۔ غیر ملکی خبر ایجنسی سے بات چیت میں کالعدم تحریک طالبان کے ایک ترجمان قاری نصرت کا کہنا تھا کہ آج ان کے خودکش بمبار نے کراچی میں کارروائی کی ہے۔ آج صبح ڈیفنس میں واقع ایس ایس پی، سی آئی ڈی چوہدری اسلم کے گھرپر نامعلوم حملہ آور نے بارود سے بھری گاڑی ٹکرا دی، جس کے نتیجے میں آٹھ افراد جاں بحق ہو گئے تھے۔
ادھر ایس ایس پی، سی آئی ڈی چوہدری اسلم نے میڈیا سے بات کرتے ہوئے کہا کہ وہ سو رہے تھے جب دھماکہ ہوا۔ انہیں اندازہ نہیں تھا کہ ان کے بچوں پر حملہ کیا جائیگا۔ انھوں نے کہا کہ وہ بزدلانہ کارروائیوں سے ڈرنے والے نہیں ہیں، وہ دہشتگردوں کے خلاف ایسی کارروائی کرینگے کہ ان کی نسلیں یاد رکھیں گی۔ ایڈیشنل آئی جی سندھ سعود مرزا نے کہا ہے کہ چوہدری اسلم کے گھر کے باہر دھماکے میں تین سو کلوگرام سے زیادہ بارودی مواد استعمال کیا گیا۔ جائے وقوعہ کے دورے کے بعد میڈیا سے بات کرتے ہوئے انہوں نے کہا کہ ایس ایس پی سی آئی اے چوہدری اسلم نے دہشتگردوں کے خلاف سب سے زیادہ کارروائیاں کی ہیں۔
آئی جی سندھ واجد درانی نےمیڈیا سے بات کرتے ہوئے کہا کہ سیکیورٹی کے انتظامات مزید بہتر بنائے جائینگے، خودکش حملوں سے حوصلے پست نہیں ہونگے۔