خوش بخت شجاعت کو گورنر سندھ بنایا گیا تو وہ ایم کیو ایم کی تصور نہیں ہونگی، کامران ٹیسوری

گورنر سندھ کامران ٹیسوری نے کہا ہے کہ کام کرنے کے باوجود مجھے گورنرشپ سے ہٹانے پر سوال ضرور ہوگا۔ نجی ٹی وی سے گفتگو کرتے ہوئے انہوں نے کہا کہ متحدہ قومی موومنٹ پاکستان کے سربراہ خالد مقبول صدیقی کے علاوہ فاروق ستار، مصطفیٰ کمال سمیت قیادت کہہ چکی ہے کہ وہ ہی ایم کیو ایم کی جانب سے آئندہ بھی گورنر رہیں گے۔ کامران ٹیسوری کا کہنا تھا گورنر سندھ کے لیے نسرین جلیل یا دیگر کے جو نام سامنے آرہے ہیں وہ نام ایم کیو ایم پاکستان کی جانب سے نہیں آرہے، خوش بخت شجاعت کو گورنر سندھ بنایا گیا تو وہ ایم کیو ایم کی تصور نہیں ہوں گی۔ انہوں نے کہا کہ گورنر ہاؤس میں بغیر سرکاری فنڈنگ آئی ٹی یونیورسٹی قائم کی، مدینہ کی ریاست کے اصولوں پر اکاؤنٹس کو سود سے پاک کیا، مسلمان ملازمین کے لئے نماز لازمی کردی۔ ان کا کہنا تھا کہ دن میں 17 گھنٹے کام کرکے اپنے دروازے لاکھوں عوام کے لئے کھولے گئے، کام کرنے کے باوجود گورنر شپ سے ہٹانے پر سوال ضرور ہوگا۔