تسلسل کیساتھ دہشت گردی کے واقعات افسوسناک ہیں، اطہر عمران

اسلام ٹائمز۔ امامیہ اسٹوڈنٹس آرگنائزیشن پاکستان کے مرکزی صدر اطہر عمران طاہر نے کوئٹہ میں زائرین کی بس پر حملہ کو افسوسناک قرار دیتے ہوئے اسے وفاقی حکومت کی نااہلی سے تعبیر کیا ہے۔ انہوں نے کہا کہ حکومت ہوش کے ناخن لے اور مذمتی قراردادوں سے باہر نکل کر دہشت گردوں کیخلاف عملی کردار ادا کرے۔ آئی ایس او پاکستان کے مرکزی سیکرٹریٹ سے جاری پریس ریلیز میں کہا گیا ہے کہ دہشت گرد آئے روز معصوم جانوں کے ساتھ کھیل کر ملک کو عدم استحکام کی طرف لے کر جا رہے ہیں اور حکومتی اہلکار ہیں کہ مذمتی بیانوں کے علاوہ کچھ نہیں کر رہے۔ انہوں نے مزید کہا کہ تسلسل کیساتھ ہونے والے قتل عام کی بنیادی وجہ حکومت کی مذاکراتی پالیسی ہے، دہشت گرد وزیرستان سے نکل کر ملک کے گوش و کنار میں پھیل چکے ہیں، ملک بھر میں طالبان کے خلاف ایک بھرپور آپریشن کی ضرورت ہے۔ انہوں نے طالبان کے ٹھکانوں پر پاک فضائیہ کی طرف سے کی گئی بمباری کی بھرپور تائید کی اور ایسے ٹارگٹڈ آپریشنز میں تیزی لانے کا مطالبہ کیا ہے۔ انہوں نے کہا کہ حکومت بزدلی کا مظاہرہ نہ کرے اور دہشت گردوں کے خلاف جاری آپریشن میں مزید تیزی لائے۔