کراچی مں ہفتہ وحدت کی مناسبت سے تقریب

اسلام ٹائمز۔ شیعہ علماء کونسل پاکستان کے مرکزی سیکرٹری جنرل علامہ ڈاکٹر شبیر حسن میثمی حبیب بینک لمیٹڈ، آفسرز پروگریسیو ایسوسی ایشن کی جانب سے منعقدہ "محفل مصطفٰی صَلَّی اللہُ عَلَیْہِ وَاٰلِہٖ وَسَلَّمَ" میں خصوصی طور پر شریک ہوئے۔ انہوں نے اپنے خطاب میں کہا کہ میں شکریہ ادا کرتا ہوں، آپ تمام میزبانوں کا کہ جنہوں نے مجھے اس پروگرام میں دعوت دی، مملکت خداداد پاکستان میں شیعہ، سنی مل کر ہفتہ وحدت کا انعقاد کرتے ہیں، اس کا مقصد محبت کو فروغ دینا ہے، پورا عالم اس وقت بہت مشکلات کا شکار ہے اور ان مشکلات کا حل سیرت نبی رحمت صَلَّی اللہُ عَلَیْہِ وَاٰلِہٖ وَسَلَّمَ سے مکمل استفادہ حاصل کرکے عوام الناس کو اس سیرت کی طرف راغب کرنا ہے۔

ان کا مزید کہنا تھا کہ رسول اعظم صَلَّی اللہُ عَلَیْہِ وَاٰلِہٖ وَسَلَّمَ نے اپنی مکمل زندگی انسانیت کی رہنمائی میں اس وجہ سے صرف کی کہ ہم کو جہالت کے اندھیروں سے نکال کر روشن حال اور مستقبل فراہم کریں، اللہ تعالیٰ کا احسان ہے کہ اُس نے ہم کو نبی رحمت صَلَّی اللہُ عَلَیْہِ وَاٰلِہٖ وَسَلَّمَ کی اُمت میں پیدا کیا، لہذا ہم سب پر واجب ہے کہ ہم آپ کی سیرت پر مکمل عمل پیرا ہوں۔ اللہ تعالٰی ہمارا حامی و ناصر ہو۔