اسلام ٹائمز۔ ڈسٹرکٹ ہیڈ کوارٹر ہسپتال اسکردو میں ہیٹنگ کیلئے لکڑیاں نہ ملنے پر مریضوں کے رشتہ داروں نے اپنے گھروں سے لے جانا شروع کردیں۔ تفصیلات کے مطابق اس وقت بلتستان ریجن میں سردی کی شدت میں آئے روز آضافہ ہورہا ہے اور اس یخ بستہ سردی میں زندگی گزارنا مشکل ہوتا جارہا ہے۔ لیکن ڈسٹرکٹ ہیڈ کوارٹر ہسپتال میں زیر علاج مریضوں کیلئے ہیٹنگ کے طور پر صبح سے شام تک صرف کچھ لکڑیاں ملتی ہے جو کہ آٹے میں نمک کے برابر بھی نہیں ہوتیں، سردی کی شدت کے باعث ہسپتال میں زیر علاج مریض ٹھیک ہونے کے بجائے مزید کئی بیماریوں کا شکار ہوجاتے ہیں۔