اسلام ٹائمز۔ اننت ناک اسلام آباد میں مقبوضہ کشمیر پولیس کےہاتھوں گرفتار ہونے والے بلال احمد ڈار کی تشدد زدہ لاش ریلوے ٹریک پر پھینکے جانے کے خلاف کشمیریوں کی بڑی تعداد سٹرکوں پر نکل آئی۔ سری نگر کے علاقوں صراف کدل، بوہری کدل، مہاراج گنج وزینب کدل سمیت مختلف علاقوں میں گذشتہ روز ہڑتال رہی اور بھارت کے خلاف احتجاجی مظاہرے ہوئے۔ سری نگر کے علاقے پاری پورہ میں تھانے کی عمارت کے قریب نصب بم ناکارہ بناتے ہوئے بم دسپوزل اسکواڈ کے 4 اہل کار اور تھانے کا ایس ایچ او بم پھٹنے سے شدید زخمی ہو گئے۔ شہید بلال احمد ڈار کو بھارتی فورسسز نے احتجاج کے دوران پتھرائو کے الزام میں گرفتار کیا تھا۔ بلال ڈار کی شہادت کی خبر پورے شہر میں جنگل کی آگ کی طرح پھیل گئی۔ مشتعل کشمیری سٹرکوں پر نکل آئے اور انھوں نے بھارت و بھارتی فوج و پولیس کے خلاف سخت نعرے بازی کی۔